 Aiò! Leghji! |
Furmazioni cuntiniva Lingua corsa/Aprili 2009
|
Aiò! Leghji! |
|
2 3 4 5 6 7 8 9 10 11 12 13 14 15 16 17 18 19 20 21 22 23 24 |
Ci n'era po ghjenti inflacchinata, chì aspettaia davanti à l'arcu di bussu è fiori ch'iddi aviani fattu i zitiddoni à u purtonu di Pacceccu. Si maritaia Mariuccia, a so fiddola sola è vintannina. U sposu, un gendarmu pinzutu, s'era sciaccatu in tinuta di cerimonia, è si ne staghjiva sticchirillitu cum'è un granatieru di guardia, accant'à i soi ... Infini chì dopu un'ora d'aspittera, affaccò Mariuccia à boccarisa, è bella chì paria una Madonna, accolta da l'evivi è i sciaccamani di tutti quanti. È po a schiera s'infilarò appressu à i sposi tinuti à braccetta, chì da a mamma, chì da u babbu. U più fieru era Pacceccu. Par purtà a fiddola, s'era incalfatu un cappiddonu negru è s'era annudatu un beddu fiuccone russu nant'à una camisgia bianca. Spinzutava à issa più bedda ! Smilzu è ingrillachjitu, ni paria un merlacconu cù a so mutenda di viddutu negru. Era po ora ch'iddi finischini i pinseri è i stanti ! Avà sì, chì pudaria goda si, in santa paci, a so pinsiunedda, cù Fiffina a moglia ! A merria ùn era tantu luntanu, è mancu a ghjesia. È a schiera a si piddò à pedi pà issi stretti, buschendu si ogni tantu una manatedda di risu o di granu lampata à i sposi in auguriu di pruspirità. U merri, u so parenti, li feci un beddu discorsu chì parlaia di fedi è di l'amori trà moglia è maritu. U campanili scampanaia à festa. A ghjesia era alluminata è fiurita. A benedizzioni di l'aneddi fù cusì cummuventi, trà canti è organi, chì à Pacceccu, in paparia, li sbuttonu i lacrimi. Oramai, Fiffina è iddu a si passariani soli soli, à invichjà, aspittendu i nutizii di i fiddoli, è a morti, cum'è tanti disgraziati di u paesu. Ma, à l'isciuta, iddu si parò davanti tutta a ghjenti attuali, à festighjà è fà roma è toma da finamenti à l'alba. |
2 3 4 5 6 7 8 9 10 11 12 13 14 15 16 17 18 19 20 21 22 23 24 |